गीत-तैं मोला भुला के जी पाबे का बता।
तैं मोला भुला के जी, पाबे का बता।
मैं तो तड़पते हौं, तैं खुद ला झन सता।।
मोर दिल के धड़कन, नाम लेथे तोर वो।
तोर दिल के धड़कन, नाम लेथे मोर वो।
तोर मोर जिनगी के, एक्के हे पता।
तैं मोला भुला के जी, पाबे का बता।।
कइसे पहाबे जिनगी, तोर उमर हे सोला।
कोन बात ला धरे हस, नइहे सुरता मोला।
जिनगी मा होते रइथे, छोट मोट खता।
तैं मोला भुला के जी, पाबे का बता।।
चुरत रबे रिस मा कब तक, भूत ला भूल जा।
छुटे नही जिनगी भर, मया रंग मा घूल जा।।
ये तन पुजारन ए, दिल आये देवता।
तैं मोला भुला के जी, पाबे का बता।
जीतेन्द्र वर्मा"खैरझिटिया"
बाल्को,कोरबा(छग)
💐💐💐💐💐💐💐💐💐💐💐
गीत-झन छोड़ मया ला।
झन छोड़ मया ला।
झन छोड़ मया ला।।
हाय मोर मया ला।
हाय मोर मया ला।।
जान के तैंहा खेल खिलौना,
झन तोड़ मया ला—----------
मया हे ता, सांस चलत हे।
मया मा मन पंछी पलत हे।।
बिन मया के तन न मन हे,
राखे रहिबे जोड़ मया ला—------
देखेंव सपना मया ला पा के।
सरी दुनिया ले दुरिहा जाके।।
बीच मझधार मा तैंहा सजनी,
झन बोर मया ला—-----------
लड़की
जरत हवों मैं अलथी कलथी।
होगे मोर ले भारी गलती।।
अंतस मा बसाके रखहूँ,
मैं तोर मया ला—----------
जीतेंद्र वर्मा"खैरझिटिया"
बाल्को कोरबा(छग)
No comments:
Post a Comment