आज फेर कलम धरे हों.......

 ....आज फेर कलम धरे हों.......

-------------------------------------------

ओखर बर जे दबते जात हे|

ओखरो बर जे तपते जात हे|

जेन नई बोल सके,

अपन मन के भॉखा|

जेन खात हे,

जघा-जघा चॉटा|

कतरो रोवत हे ,

सुसक-सुसक के|

गोड़ तरी चपकाय हे,

मचान म घलो चक के|

दरद ल दिल के,

देखा नई सके|

जेन रॉंधथे रोटी,

फेर खा नई सके|

जुलूम के तॉवा म,

मंहू जरे हों.............|

आज फेर कलम धरे हों||

गिरे-थके हपटे बर|

खोंचका-डिपरा ल खपटे बर|

सुमत के दिया बारे बर|

अंधरा के ऑखी उघारे बर|

बंटाय मया ल जोरे बर|

सुवारथ के सुरता छोरे बर|

सिखाय बर इंसानी बात|

मॉगे बर सबके साथ|

पंवरी म सबके परे हों.........|

अाज फेर कलम धरे हों......|

खा पेटभर; खवा पेटभर|

कखरो रोटी ल,झन नंगा पेटभर|

देखा भुलाय ल रद्दा|

झन खन कखरो बर गढ्ढा|

उजरा ओनहा- कोनहा ल|

सजा दाई सोनहा ल|

कखरो बॉटा ल ,

कोनो ल खान झन दे|

फोकटे नई रोय,

कोनो ल ऑसू बोहान झन दे|

बॉटे म बढ़ते मया,

मंय धरे मया खड़े हों.....|

आज फेर कलम धरे हों...|

              जीतेन्द्र वर्मा"खैरझिटिया"

                  बाल्को(कोरबा)