पानी होगे हे का?
------------------------------------------
पानी होगे हे का, खून छत्तीसगढ़िया के?
कहॉगे ऊबाल अऊ जुनून छत्तीसगढ़िया के?
ये जंगल अऊ जमीन तोर ए|
ये रात अऊ दिन तोर ए |
धूर्रा चंटाये हस,बड़े-बड़े ल |
दूसर झोरत हे,तोर रॉधे गढ़े ल|
सिरागे बासी अउ,नून छत्तीसगढ़िया के|
पानी होगेहे का,खून छत्तीसगढ़िया के?
अघुवा बेटा पिछलग्गू होगे|
बारूद के गोला लड्डू होगे|
अलगागे जेन संघरा राहय|
ऑखी जेखर अँगरा राहय|
बोले नही दूसर,बोली सुन छत्तीसगढ़िया के|
पानी होगे हे का, खून छत्तीसगढ़िया के?
गुलामी के बूबू,चॉब देहे सबला|
दूसर के धुन म,बजात हे तबला|
वो मेंछा के ताव कहॉ हे?
लड़ईया मरईया गॉव कहॉ हे?
का करना कहिके काया म,
लगगे घुन छत्तीसगढ़िया के..|
पानी होगे हे का,खून छत्तीसगढ़िया के?
पछाड़ के सबला,अघवाएल पड़ही|
कतका दम हे, तेला देखाएल पड़ही|
खात हस तेला छूटना हे|
सबला अब जुटना हे|
तभे गाही सब गुन छत्तीसगढ़िया के..|
पानी होगेहे का,खून छत्तीसगढ़िया के?
कहॉगे ऊबाल अऊ जुनून छत्तीसगढ़िया के?
जीतेन्द्र वर्मा"खैरझिटिया"
बाल्को(कोरबा)
[ छत्तीसगढ़ में रहने वाले सभी लोग जो यहॉ के अन्न पानी खाये व वस्तुओ और सेवाओ के उत्पादन में अपना योगदान दे....सभी छत्तीसगढ़िया है.]....
No comments:
Post a Comment