पाँव लमायेन जतिक जादा-सरसी छंद
पाँव लमायेन जतिक जादा, ततिक हवन परसान।
एक जमाना मा घर गाँव ह, सुख के लागे खान ।।
नइ माँगिस हे खपरा छानी, कभ्भू कूलर फ्रीज।
मुड़मिंजनी माटी के आघू, फेल लक्स अउ ब्रीज।।
छेना लकड़ी खाके हाँडी, हाँसे साँझ बिहान।
पाँव लमायेन जतिक जादा, ततिक हवन परसान।।
कोलाबारी के तरकारी, पारा ला दै तार।
नदिया नरवा बोरिंग कुआँ, बहे दूध कस धार।।
असली धन अरसी जौ सरसो, चना गहूँ अउ धान।
पाँव लमायेन जतिक जादा, ततिक हवन परसान।।
नीम आम अमली बर पीपर, देय फूल फर छाँव।
सिंहासन कस चौकउ चौरा, लगे सरग कस गाँव।
छत सीमेंट आय हे जब ले, तब ले हन हल्कान।
पाँव लमायेन जतिक जादा, ततिक हवन परसान।।
बबा कहानी रोज सुनावै, दाई लोरी गाय।
हाट सजे हर हप्ता हप्ता, चीज सबे मिल जाय।।
पेट संग मा जिया अघाये, गांव देय वरदान।
पाँव लमायेन जतिक जादा, ततिक हवन परसान।।
सुविधा दुविधा बनत जात, हाल होय बेहाल।
महँगाई के मार पड़त हे, मनुष बजावँय गाल।।
सुरता जुन्ना समय आत हे, काला काय बतान।
पाँव लमायेन जतिक जादा, ततिक हवन परसान।।
जीतेन्द्र वर्मा"खैरझिटिया"
बाल्को, कोरबा(छग)
No comments:
Post a Comment