पितर पाख

पितर पाख म
----------------------------
पितर      आय      हे ,
पितर       पाख     म।
महर-महर ममहावत हे,
बरा-सोंहारी  नाक  म।

माड़े     हे     मुहाटी      म,
मुखारी बोरे लोटा म  पानी।
चंऊक पुराय भूतवा    कस,
चढ़े   फूल  आनी  -   बानी।
तोरई पाना म उरिद दार धरे,
ददा           गेहे       तरिया।
दाई   साने      हे      पिसान,
दार   धोय हे चरिहा - चरिहा।
टुरी - टुरा  बइठे  चूल्हा   तीर,
तेलई      के      ताक       म।
पितर आय हे....................।

झेंझरी   -    झेंझरी       रोटी ,
बनके           तियार         हे।
पारा  -   परोसी    सगा-सोदर,
सब     बर       तिहार       हे।
हूम  -   धूप      के       गुंगवा,
घर        भर      गुंगवात     हे।
कुकुर-कंऊवा नरिया-नरिया के,
किंजर -  किंजर   के  खात  हे।
दूधे     दूध   के  तसमई  बने हे,
बरबट्टी -  तोरई   हे    साग   म।
पितर आय हे......................।

जंऊहर    आदर  सतकार ,
पितर     के      होत      हे।
जीयत    डोकरी  - डोकरा,
कल्हर - कल्हर  के  रोत हे।
जीयत     म    दाई-ददा  के,
नई       तरसाबे        चोला।
त   मरे    म    तोर     पितर,
आसीस       दिही      तोला।
जीयत के  सेवा  सार        हे,
राख के सेवा मिलही राख म।
पितर आय हे...................।

    जीतेन्द्र वर्मा"खैरझिटिया"
      बालको(कोरबा)
      9981441795