..खेती अपन सेती.......

 जय जवान जय किसान

......खेती अपन सेती.......

------------------------------------------------

किसन्हा के भाग मेटा झन जाय |

बाँचे-खोंचे भुँइया बेचा झन जाय ||

भभकत हे चारो मुड़ा ईरसा के आगी,

कुंदरा  किसनहा के लेसा  झन जाय |

अँखमुंदा भागे नवा जमाना के गाड़ी,

किसनहा बपुरा मन रेता  झन जाय|

मूड़  मुड़ागे,ओढ़ना - चेंदरा चिरागे,

फेर सिर पागा, गल फेटा झन जाय|

बधथन बधना, बिधाता तीर जाके रात-दिन,

कि सावन-भादो भर गोड.के लेटा झन जाय|

भूंजत हे भुंजनिया, सब बिजरात हे हमला,

अवइया पीढ़ी ल खेती बर चेता झन जाय |

हँसिया-तुतारी,नांगर -बइला-  गाडी़,

कहीं अब इती-उती फेका झन जाय |

साहेब बाबू बने के बाढ़त हे आस ,

देख के हमला किसानी के पेसा झन जाय|

दँउड़े हन खेत-खार म खोर्रा पॉंव घाव ले,

कहूँ बंभरी  कॉटा  तहूँ ल ठेसा झन जाय |

नइ धराय मुठा म् रेती, खेती अपन सेती,

भूख मरे बर खेत कखरो बेटा झन जाय|

                 जीतेन्द्र वर्मा'खैरझिटिया'

                      बाल्को( कोरबा)

किसान दिवस के सादर बधाई।