संगे संग मया

संगे संग मया

अब कइसे रचही, मधूबन म रास रे ? मोर तीर हे बंसरी, अऊ तोर तीर हे साँस रे ।

कलेचुप खड़े हे, कदम के रूखवा । तंय पूर्वाइयाँ, अऊ मंय हर पात ||

कइसे ममहाही, मया के मोंगरा ? मंय हर पतझड़, अऊ तंय मधूमास रे ।।

चलत हे बरोड़ा, उड़ावत हे धूर्रा । तंय हर बिरौनी, मंय हर आँख रे ।।

मइलहा मन, मनभात नइहे मनखे के । मया के तरिया म, मन ल काँच रे ।।

फेंक के देख मया के गरी, छत्तीसगढ़ भर । अइसने अरझ जही, फेर छल ले झन फाँस रे ।।

न रो, न रोवा, खा तेंदू -चार - कोवा ।

टपका मुंहुँ ले मंदरस, अऊ मन भर हाँस रे ।।

थोरकिन ते खा, थोरकिन भूखाय ल खवा । कर सिंगार महतारी के, नंवाके माथ रे ।।

ओनहा- कोनहाल, करदे अंजोर । मया के माटी ले, उँच-नीच ल पाट रे ।।

का हे भरोसा, जिनगी के सिरतोन म ? मया - पिरीत ल, झंऊहा- झंऊहा बाँट रे ।।

जीतेन्द्र वर्मा खैरझिटिया