मर लगगे फोटू विडियो-कुकुभ छंद
कई काम ला चुपेचाप रहि, मनखे ला करना चाही।
सबे चीज के फोटू विडियो, सदा मान थोरे पाही।।
सेवा सत सुख गुण गियान ला, देखाये बर नइ लागे।
तोपे ढाँके के उघरत हे, उघरे के हा तोपागे।।
हवै मनुष के आय जातरी, धारेच धार बोहाही।
कई काम ला चुपेचाप रहि, मनखे ला करना चाही।।
बर बिहाव छट्ठी बरही के, समझ आय विडियो फोटू।
मरनी हरनी जलत लाश ला, नइ छोड़त हावय मोटू।।
रील बनाये के चक्कर मा, नवा जमाना बोहाही।
कई काम ला चुपेचाप रहि, मनखे ला करना चाही।।
फोटू विडियो मा हे नत्ता, असल बइठगे हे भट्ठा।
मरगे हावय मान मनुष के, भक्ति भाव होगे ठट्ठा।।
आँखी मूँदे बर लागत हे, अउ का काली देखाही।
कई काम ला चुपेचाप रहि, मनखे ला करना चाही।।
जीतेन्द्र वर्मा"खैरझिटिया"
बाल्को,कोरबा(छग)
No comments:
Post a Comment