वाह रे पानी-सार छंद
पके पकाये धान पान के, अब तो मरना होगे।
खेवन खेवन पानी बरसे, सफरी सरना सोगे।
का कुँवार का कातिक कहिबे,लागत हावै सावन।
रोहों पोहों खेत खार हे, बरसा बनगे रावन।।
धान सोनहा करिया होगे, लगगे कतको रोगे।
पके पकाये धान पान के, अब तो मरना होगे।
लूवे टोरे के बेरा मा, कइसे करयँ किसनहा।
आसा के सूरज हा बुड़गे,बुड़गे डोली धनहा।
जाँगर टोरिस जउन रोज वो, दुख मा अउ दुख भोगे।
पके पकाये धान पान के, अब तो मरना होगे।।
करजा बोड़ी के का होही, संसो फिकर हबरगे।
देखमरी बादर ला छागे, देखे सपना मरगे।
चले धार कोठार खेत मा, सोच सोच सुध खोगे।
पके पकाये धान पान के, अब तो मरना होगे।
जीतेन्द्र वर्मा"खैरझिटिया"
बाल्को, कोरबा(छग)
💐💐💐💐💐💐💐💐💐💐
No comments:
Post a Comment